Du weisst i ghör ned zu die Bastler, des tu i nur wenn i was brauch des ned zum kaufen gibt.
A Trum des im Handel €35,- kost, des kaufima und bastls ned, weil 2x Baumarkt hin und retour, 5 Mio. depperte Leit die ma a halbe stund vor da Kassa ins Gnack hustn und 2h bastln und a ohbrochana Bohrer und dann gehts erst nur so ähnlich und ned wie...dafür hab i kane Nerven.
So viel zum grundsätzlichen.
Glei gscheit kaufen tätn mit Sicherheit eh die meisten wollen, aber wie machst des?
Sowas geht ja nur live mit angreifen und ggf. ohmessen.
Dafür telefonier i zerscht in der Weltgeschichte herum, wer sowos hod und obmasis anschaun kann, dann fahrst hin, unglücklicherweise s meiste in Wean, Parkplatz suchen, in Hundsdreck steigen, Halteverbot übersehen, Mandat kassieren, am Gürtel si mit die Taxler und Hobby-Autofahrer anlegen usw. Des ois nur dassi dann feststellen muss "Ah geht ned, Gitter is bei den aa z gross!"
Na wurscht, fahri glei zum nächten Haushaltswarentandler, der is ja nur zwaa moi ums Eck.
Zwaa moi ums Eck is bei mir daham am Land so um die hundert Meter, des geht ma, des foahrt ma ned.
Ned in Little Bagdad!
I sich zwar von mein Parkplatz bis direkt hin zum nächsten Gschäft aber i steh grad ned so günstig, nämlich von der vordern Stoßstangen bis zur B-Säule auf an Behinderten-Parkplatz und mitn Rest im Parverbot weil Einfahrt.
Eigentlich hab i ja mit nur an Mandat eh a Glück kapt. Es hättn ja zwa oder drei aa sein können und a anghängte Goschen vom Einfahrtsbenutzer garniert mit an klassischen Köch mittn am Gehsteig. Mit mein Glück kann i mi dann daham mit 12.000 Klicks in YouTube anschaun weil irgend a Schüttler des ois min Handy festghalten hat.
Oisa fahrma euer Gnaden. Streckenmäßig warns leicht 20 Minuten und 18 Kilometer mit drei Mal dran vorbei fahren, dafür kenn i jetzt jeds Hundsgassl und alle Einbahnen im Umkreis vo an km.
Und dass des Gitter is bei den aa z gross war, weiss i jetzt auch.
Bis i dann wieder daham bin, bini reif für a Achtel Cognac und des scho z Mittag!
Willsta a Expedition ins Zentrum des Wahnsinns daspoarn, kannsta des Greibl ja beim Amazon bestelln, beratschlagt mich ein wohlmeinender Unwissender.
Jo na jo eh!
Dann wart i drei Tag bis Packl kummt, packs aus und stell wieder fest "Ah geht ned, Gitter is bei den aa z gross!"
Dann pack i den Scheissdreck wieder ein, hock a halbe Stund vorn PC bis i den Retourschein gfundn und ausdruckt hab, dann geht ma no da UHU zum Zedl aufpicken aus, wurscht, nimm a Isolierbandl, renn mit den Packl am nächstn Tag aufd Post und bstöö ma wieder zaus des nächste Trum usw.
Dann wart i wieder drei Tag und der ganze Zirkus geht vo vorn los.
"Ah geht ned, aa bei den is es Gitter z gross!"
I pack den Scheissdreck wieder ein, hock des mal nur mehr 10min vorn PC, weili jetz ja weiss wo i den gschissenen Retourschein find, dafür geht ma jetz die Druckerpatron aus und die neiche liegt no im Gschäft, owa an neichn UHU zum Zedl aufpicken habi dafür!
Irgendwie hab is dann gschafft, renn mit den Packl am nächstn Tag - weil der behinderte Postler draht sei Knoflhüttn ja um Punkt 12 zua und solche Packln kummen ja prinzipiell um hoiwa zwöfe - aufd Post und bstöö ma wieder zaus des nächste Trum usw.
Insgesamt hab i dann nach dreiahalb Wochen 7 verschiedene Dörrer zaus kapt wo nur beim letzten s Gitter passt hätt, der is aber mit ana zrissenen Schachtel und an zerbrochenen Gehäuse gliefert worden. I war scho so satt, dassima dengt hab, dass ma des jetz wurscht is, Haubsoch er geht. Wie i den dann probehalber angsteckt hab, ham die Stones plötzlich zum singen aufghört und vo mir bis zu die nächsten drei Stiegen is s Licht ausgangen.
Angeblich bitte angeblich, is die oide Frau Havlicek nur deswegen im finztan vom 3. Stock bis owe in 1. die Stiagn owegflogen und der Herr Muschitz, Hofrat in Rente nur mit ana langen weissn Unterhosen und a grünen T-Shit wo vorn da Kermit drauf is hat si deswegen ausgsperrt. Da Hamma was zum reden ghabt, die Nachbarn und i.
Jaaa, genau so moch i s!
I hab ja Zeit, im Ferzen is eh a nix und bevor ma fad wird...na kloar, ganz sicher!
Sagts amal....glaubts es dass i irgenwie nervenkrank, oiso deppert bin?
Scho, gö?